भेटेको नागरिकतामा आफ्नै तस्बिर टाँसेर ठग्नेहरु पक्राउ

द नेप्लिज संवाददाता

२३ फागुन २०८१, शुक्रबार

विराटनगर– कसैको नागरिकता भेटेमा के गर्छौँ ? चिन्छौँ भन्ने सम्बन्धित व्यक्तिलाई र अपरिचित भएमा नजिकको प्रहरी कार्यालयमा बुझाउँछौँ । तर सप्तरीमा अर्काको नागरिकतामा आफ्नो तस्बिर टाँसेर ठगी गरेको आरोपमा दुई युवकलाई प्रहरीले पक्राउ गरेको छ ।

पक्राउ पर्नेमा सप्तरीको राजविराज–१२ का २८ वर्षीय अभिषेक यादव र २० वर्षीय अरुणकुमार यादव रहेको प्रहरीले जनाएको छ । उनीहरु राजविराज–५ मा बस्छन् । उनीहरूले २०८० को असारमा एक जनाको नागरिकता भेटेका थिए । प्रहरीका अनुसार दुवै जनाले नागरिकताको दुरुपयोग गरी ठग्ने योजना बनाए ।

आरोपितमध्ये अरुणको फोटो टाँसेर दुवैले मिलेर विराटनगरस्थित सिटिजन्स बैंकमा खाता खोली अन्य व्यक्तिहरूबाट लाखौँ रकम ठगी गरिरहेको खुले पछि पक्राउ गरिएको प्रहरीले जनाएको छ । प्रहरीका अनुसार नागरिकतासम्बन्धी कसुर एवं ठगीमा जाहेरी परेको उनीहरु विरुद्ध अदालतबाट म्याद थप गरी अनुसन्धान अगाडि बढाइएको छ ।

सप्तरी प्रहरी प्रमुख एसपी ढकेन्द्र खतिवडाले असुन्धानको यो पहिलो चरणमा कीर्तेमा मुद्दा अगाडि बढाएको बताए । जाहेरीवाला पक्षले नागरिकता र नक्कली सिम प्रयोग गरेर आफ्नो नाउँमा लाखौं ठगी गरेको भनेका हुनाले सम्बद्ध बैंक र नेपाल टेलिकमसँग विवरण मागेको उनले बताए । ‘प्राप्त विवरण पछिको अनुसन्धानबाट निस्कने तथ्यलाई हामी जनचेतनाको हिसाबले पछि फेरि सार्वजनिक गर्छौँ,’ एसपी खतिवडाले द नेप्लिज डट कमसँग भने ।

प्रकाशित : २३ फागुन २०८१, शुक्रबार 16:47