घुस लिँदालिँदै मालपोतका कर्मचारी र कानून व्यवसायी पक्राउ

द नेप्लिज संवाददाता

२८ फागुन २०८१, बुधबार

विराटनगर- अख्तियार दुरुपयोग अनुसन्धान आयोगले महोत्तरीको भूमिसुधार तथा मालपोत कार्यालय, जलेश्वरबाट एक कर्मचारी र एक लेखापढी कानून व्यवसायीलाई घुस लिँदालिँदै नियन्त्रणमा लिएको छ । आयोगको कार्यालय, बर्दिबासबाट खटिएको टोलीले मंगलबार (हिजो) उक्त कारबाही गरेको हो।

आयोगका प्रवक्ता राजेन्द्र कुमार पौडेलद्वारा जारी प्रेस विज्ञप्ति अनुसार, महोत्तरी मालपोत कार्यालयका खरिदार मुन्नु कुमार दास र लेखापढी कानून व्यवसायी जिवछ महतोले जग्गाको ट्रायल चेक गरी नक्सा सुधार गर्न सहजीकरण गरिदिने भन्दै सेवाग्राहीसँग घुस माग गरिरहेको सूचना प्राप्त भएको थियो।

उक्त सूचना र उजुरीका आधारमा खटिएको टोलीले दुवैलाई सेवाग्राहीबाट ३५ हजार रुपैयाँ घुस लिने क्रममा नियन्त्रणमा लिएको हो । पक्राउ दास र महतोमाथि उक्त रकमसहित थप अनुसन्धान भइरहेको आयोगले जनाएको छ।

प्रकाशित : २८ फागुन २०८१, बुधबार 10:28