गृहमन्त्रीको निर्णयमा ७ डीआईजीको सरुवा, ६ प्रदेशमा नयाँ प्रहरी प्रमुख नियुक्त

द नेप्लिज संवाददाता

२१ वैशाख २०८२, आइतबार

विराटनगर— नेपाल प्रहरीका सात जना प्रहरी नायब महानिरीक्षक (डीआईजी)को सरुवा गरिएको छ। गृह मन्त्रालयमा आइतबार बसेको मन्त्रीस्तरीय बैठकले निर्णय गर्दै कर्णाली बाहेक सबै प्रदेशका प्रहरी प्रमुख फेरिएको हो।

गृहमन्त्री रमेश लेखकको निर्णयमा डीआईजी ईश्वर कार्कीलाई कोशी प्रदेश, उमा प्रसाद चतुर्वेदीलाई मधेस प्रदेश, अरुण पौडेललाई बागमती प्रदेश, दिनेश कुमार आचार्यलाई गण्डकी प्रदेश, राजेन्द्र प्रसाद भट्टलाई लुम्बिनी प्रदेश र डम्बर बहादुर विकलाई सुदूरपश्चिम प्रदेश प्रहरी प्रमुखको जिम्मेवारी दिइएको छ।

त्यस्तै प्रहरी प्रधान कार्यालयको प्रदेश समन्वय विभागमा कार्यरत डीआईजी गोविन्द थपलिया केन्द्रीय अनुसन्धान ब्युरो (सीआईबी)मा सरुवा गरिएको प्रहरी उपरीक्षक योगेन्द्र सिंह थापाले जानकारी दिए।

यस सरुवापछि अब कर्णाली प्रदेश बाहेक अन्य सबै प्रदेशमा प्रहरी नेतृत्व परिवर्तन भएको छ।

प्रकाशित : २१ वैशाख २०८२, आइतबार 21:44