पाँच सय दरका नक्कली नेरु नोटसहित एक व्यक्ति पक्राउ

द नेप्लिज संवाददाता

२५ वैशाख २०८२, बिहीबार

विराटनगर– मकवानपुरको हेटौँडा उपमहानगरपालिका–१५ रातोमाटेबाट प्रहरीले नेरु ५ सय दरका १ सय ८६ थान नक्कली नोटसहित एक व्यक्तिलाई पक्राउ गरेको छ। पक्राउ पर्ने हेटौंडा–८ कमाने बस्ने, धादिङ गंगाजमुना गाउँपालिका–२ स्थायी ठेगाना भएका ४२ वर्षीय रामकृष्ण अधिकारी हुन्।

प्रहरी चौकी रातोमाटेबाट खटिएको टोलीले महोत्तरीबाट हेटौँडा बजारतर्फ जाँदै गरेको बा.३३ प ९९८३ नम्बरको मोटरसाइकललाई जाँच गर्ने क्रममा उक्त नक्कली नोट फेला पारी अधिकारीलाई पक्राउ गरेको हो। प्रहरीले घटनास्थलमै नोटहरू बरामद गरेको छ। यस सम्बन्धमा प्रहरीले आवश्यक अनुसन्धान गरिरहेको जनाएको छ।

नेपालमा नक्कली नोट कारोबारको घटनाहरू बढ्दो क्रममा छन्। गत वर्ष मकवानपुरकै विभिन्न स्थानबाट ५५ हजार नक्कली नोटसहित पाँच जना पक्राउ परेका थिए। उनीहरूबाट नेपाली एक हजार दरका नक्कली नोटहरू बरामद गरिएको थियो। त्यस्तै काठमाडौँमा ५२ लाख नक्कली नोटसहित नौ जना पक्राउ परेका थिए। उनीहरूबाट नोट छाप्ने मेसिन, प्रिन्टर, ल्यापटप लगायतका सामग्रीहरू समेत बरामद गरिएको थियो।

प्रकाशित : २५ वैशाख २०८२, बिहीबार 18:37