अनलाइन जुवा अखडाबाट ३ अर्बको कारोबार

२८ माघ २०८१, सोमबार

विराटनगर– भारतीय नागरिकहरुलाई लक्षित गरी ‘लोटस’ नामक बेटिङ साइटबाट सट्टेबाजी गराउने २३ जनालाई प्रहरीले आइतबार राति काठमाडौंको बुढानीलकण्ठस्थित दुई तल्ले भाडाको घरबाट पक्राउ गरेको छ ।

पक्राउ परेकाहरू भारतको बिहारस्थित बाँका जिल्लाबासी भएको प्रहरीले जनाएको छ । प्रहरीले उक्त सुविधायुक्त घरबाट ८८ वटा मोबाइल फोन, १० ल्यापटप र ८१ हजार नगद पनि बरामद गरेको छ । थोरै नगद बरामद भए पनि सुरुवाती अनुसन्धानबाट करिब ३ अर्बको कारोबार गरेको भेटिएको अनुसन्धानमा संलग्न एक अधिकृतले बताए । क्यासिनो प्रकृतिको जुवा सञ्चालन गरेर अर्बौँ कारोबार गरेको देखिएको प्रहरीले भनेको छ ।

जिल्ला प्रहरी परिसर काठमाडौंको टोलीले बुढानीलकण्ठ–३ स्थित छापा मारेको घरमा ।

बरामद गरिएका मोबाइलमा फेला परेको तथ्यांकको विश्लेषण गरिरहेको ती प्रहरी अधिकृतले बताए । उनका अनुसार यो गिरोहको सहयोगीहरु सीमावर्ती सहरहरुमा सक्रीय रहेको देखिएको छ ।

पूर्वसूचनाका आधारमा जिल्ला प्रहरी परिसर काठमाडौंको टोलीले बुढानीलकण्ठ–३ स्थित उक्त घरमा छापा मारेको थियो । अनलाइन बेटिङको जालो बारेमा लामो समयदेखि अनुसन्धान गरिरहेका अर्का एक प्रहरी अधिकृतले भने, ‘छापा मार्नु अघि यति ठूलो गिरोह होलान् भन्ने सोचेका थिएनौं ।’

प्रहरीले मुलुकी अपराध संहिता २०७४ को दफा १२५ अनुसार सट्टेबाजी गर्नु वा गराउन नहुने कसुर अन्तर्गत् अनुसन्धान अघि बढाएको उक्त मुद्दामा बिगो रकम जफत गरी कसुर गर्नेलाई एक वर्षसम्म कैद र १० हजार जरिवाना सम्म हुने कानूनी व्यवस्था छ।

प्रकाशित : २८ माघ २०८१, सोमबार 16:13