किशोरीलाई बलात्कार गरेको आरोपमा युवक पक्राउ

द नेप्लिज संवाददाता

१० चैत २०८१, आइतबार

रसुवा – १७ वर्षीया किशोरीलाई बलात्कार गरेको आरोपमा एक युवक पक्राउ परेका छन् । पक्राउ पर्नेमा गोसाईकुण्ड गाउँपालिका–५ स्याफ्रुवेशी बस्ने रूकुम पश्चिम, मुसिकोट नगरपालिका–१ का २३ वर्षीय नविन रावल भएको प्रहरीले जनाएको छ ।

प्राप्त जानकारी अनुसार रावलले ती किशोरीलाई जबरजस्ती करणी गरेको भन्ने उजुरीको आधारमा प्रहरीले अनुसन्धान थालेको थियो । यही क्रममा प्रहरी चौकी स्याफ्रुवेशीबाट खटिएको टोलीले उनलाई शनिबार दिउँसो पक्राउ गरेको हो ।

प्रहरीका अनुसार पीडित किशोरी तथा अभियुक्तबीचको सम्बन्ध र घटनाका थप विवरणबारे अनुसन्धान जारी रहेको छ । कानुनी प्रक्रिया अघि बढाउने उद्देश्यले पीडितको स्वास्थ्य परीक्षण गरिनुका साथै अभियुक्तलाई जिल्ला अदालतबाट म्याद थप गरी अनुसन्धान प्रक्रिया अघि बढाइएको प्रहरीले जनाएको छ ।

नेपालमा यौन हिंसा तथा जबरजस्ती करणीका घटनाहरू गम्भीर सामाजिक समस्याका रूपमा देखा परिरहेका छन् । कानुनी प्रावधानअनुसार जबरजस्ती करणी प्रमाणित भएमा दोषीलाई कडा सजाय हुन सक्छ ।

मुलुकी अपराध संहिता, २०७४ अनुसार, १८ वर्षभन्दा कम उमेरकी बालिका माथि जबरजस्ती करणी गरेमा दोषीलाई १० देखि १२ वर्षसम्मको कैद सजाय हुन सक्ने व्यवस्था छ । प्रहरीले नागरिकलाई यस्ता घटनाहरू तुरुन्त जानकारी गराउन आग्रह गर्दै अपराधविरुद्धको सहयोगी बन्न अनुरोध गरेको छ।

प्रकाशित : १० चैत २०८१, आइतबार 13:35