लागूऔषधसहित ८ जना पक्राउ

द नेप्लिज संवाददाता

२६ फागुन २०८१, सोमबार

बिराटनगर– झापा र मोरङबाट लागूऔषधसहित ८ जनालाई प्रहरीले पक्राउ गरेको छ । मोरङको विराटनगर–१५ मा लागूऔषध नियन्त्रण व्यूरो विराटनगर र इलाका प्रहरी कार्यालय रानी (सिमा)बाट खटिएको प्रहरी टोलीले जाँचको क्रममा भारतबाट नेपालतर्फ आउँदै गरेको पैदल यात्री बेलबारी–११ का २७ वर्षीय विशाल गुरुङ र सुनसरी इटहरीका १९ वर्षीय आर्यन राजधामीलाई १० ग्राम १३१ मिलिग्राम ब्राउन सुगर सहित नियन्त्रणमा लिएको छ ।

त्यसैगरी इलाका प्रहरी कार्यालय सिजुवाले रतुवामार्इ–४ का २५ वर्षीय सुरज ताजपुरीया, २६ वर्षीय बिक्रम चौधरी र २६ वर्षीय अशोक गुरुङलाई २०० मिलिग्राम ब्राउन सुगरसहित नियन्त्रणमा लिएको छ भने प्रतिबन्धित लागूऔषध पियूवोन स्पास प्लस २८८ ट्याब्लेटसहित बुढीगंगा–५ का २७ वर्षीय मोहम्मद नवाफलाई इलाका प्रहरी कार्यालय नेमुवाले र झापाको भद्रपुर नगरपालिका–५ स्थित लागूऔषध नियन्त्रण ब्युरो काकरभिट्टाबाट खटिएको प्रहरी टोलीले १ ग्राम २ मिलिग्राम ब्राउन सुगरसहित मेचिनगर नगरपालिका–१० का २६ वर्षीय प्रकाश यादव र ३२ वर्षीय साकिर महमदलाई पक्राउ गरेको हो । लागूऔषधसहित पक्राउ परेका उनीहरुको सम्बन्धमा थप अनुसन्धान भईरहेको प्रदेश प्रहरीले जनाएको छ ।

प्रकाशित : २६ फागुन २०८१, सोमबार 12:06