राप्रपा सांसद धवलशमशेर फौजदारी अभियोगमा पक्राउ

१६ चैत २०८१, शनिबार

काठमाडौँ — राजावादी प्रदर्शनका क्रममा आगजनी, तोडफोड र लुटपाटमा संलग्न भएको आरोपमा पक्राउ परेका राप्रपाका सांसद धवलशमशेर जबरासम्बन्धी जानकारी प्रहरीले सभामुख देवराज घिमिरेलाई पत्रमार्फत गराएको छ ।
जिल्ला प्रहरी परिसर, काठमाडौंले सांसद जबरा पक्राउ परेको जानकारी संसद् सचिवालयलाई पत्र पठाएर गराएको हो । संसद् सचिवालयका प्रवक्ता एकराम गिरीका अनुसार प्रहरीको पत्र प्राप्त भइसकेको छ । सांसद जबरालाई शुक्रबार साँझ पक्राउ गरिएको थियो।

संविधानको धारा १०३ (६) अनुसार कुनै सांसदलाई फौजदारी अभियोगमा पक्राउ गरिएमा सभामुखलाई जानकारी दिनुपर्ने व्यवस्था छ । सोहीअनुसार प्रहरीले पत्राचार गरेको हो । संविधानमा उल्लेख भएअनुसार अधिवेशन जारी रहेको अवस्थामा सांसद पक्राउ गर्न रोक लगाइए पनि फौजदारी अभियोगमा संघीय कानुनअनुसार पक्राउ गर्न सकिने स्पष्ट व्यवस्था छ । पक्राउ परेपछि सम्बन्धित सदनका अध्यक्षलाई तुरुन्त जानकारी गराउनुपर्ने प्रावधानअनुसार नै प्रहरीले पत्र पठाएको हो ।

प्रकाशित : १६ चैत २०८१, शनिबार 16:51