विराटनगर– आज हिन्दू धर्मालम्बीहरूले अत्यन्त पवित्र र शुभ दिनको रूपमा मनाउने अक्षय तृतीया तथा शिव–पार्वती विवाह महोत्सव देशभर विविध धार्मिक कार्यक्रमका साथ मनाइँदैछ ।

अक्षय तृतीया जसलाई ’अबुझ मुहूर्त’ पनि भनिन्छ, वैशाख शुक्ल तृतीयाका दिन मनाइन्छ । ’अक्षय’ शब्दको अर्थ ’कहिल्यै क्षय नहुने’ हो। यस दिन गरिएका दान, पुण्य, पूजा, विवाह, व्यापार आदि कार्यहरू सदा स्थायी र फलदायी हुने विश्वास गरिन्छ।

धार्मिक मान्यताअनुसार, त्रेतायुगको आरम्भ, महाभारत ग्रन्थको लेखन प्रारम्भ, भगवान परशुराम र हयग्रीवको अवतरण, माता गङ्गाको पृथ्वीमा आगमन र भगवान कृष्ण र सुदामाको भेटजस्ता महत्वपूर्ण घटनाहरू यही दिन भएका थिए।

पौराणिक कथनअनुसार आजकै दिन भगवान शिव र माता पार्वतीको विवाह सम्पन्न भएको थियो। माता पार्वतीले कठोर तपस्या गरी भगवान शिवलाई पति रूपमा प्राप्त गरेकी थिइन्। यस दिनलाई शिव–पार्वतीको दिव्य प्रेम र समर्पणको प्रतीकको रूपमा लिइन्छ।

आजको दिन विशेषगरी गौरी–शंकर पूजा स्त्रीहरूले राम्रो पति वा वैवाहिक सुखका लागि गर्छन्। वृद्धवृद्धालाई लौरो, छाता, खानेकुरा आदि दान गर्ने चलन छ। यस दिन सुन, चाँदी, अन्न वा अन्य सम्पत्ति खरिद गर्नु लाभदायक मानिन्छ।सातु सेवनः चना, जौ आदि अन्नबाट बनाइएको सातु सेवन गरिन्छ, जसले शरीरलाई शीतलता प्रदान गर्छ।

अक्षय तृतीया र शिव–पार्वती विवाह महोत्सव हिन्दू धर्मालम्बीहरूका लागि अत्यन्त शुभ र पवित्र दिन हो। आजको दिन गरिएका शुभ कार्यहरू स्थायी र फलदायी हुने विश्वासले यो पर्वलाई विशेष बनाउँछ।