विराटनगर — देशमा हाल पश्चिमी वायु, स्थानीय वायु तथा बंगालको खाडी र अरब सागरबाट प्रवेश गरेको जलवाष्पयुक्त हावाको संयुक्त प्रभाव देखिएको मौसम पूर्वानुमान महाशाखाले जनाएको छ। मौसममा सक्रिय प्रणालीको कारण देशका विभिन्न भागमा बदली र वर्षाको सम्भावना रहेको बताइएको छ।

महाशाखाका अनुसार बंगालको खाडीको उत्तर–पश्चिम र दक्षिण–पश्चिम क्षेत्रमा तथा भारतको केरला, माल्दिभ्स, श्रीलङ्का लगायतमा मनसुन प्रवेश गरिसकेको छ। खाडीबाट जमिनतर्फ मनसुनको प्रवाह विस्तार हुँदै गइरहेको हुँदा नेपालमा समेत यसको असर क्रमशः देखिन सक्ने अनुमान गरिएको छ।

सोमबार दिउँसो कोशी, मधेस र बागमती प्रदेशसहित देशका पहाडी भूभागहरूमा आंशिकदेखि सामान्य बदली रहनेछ। बाँकी भागमा भने मौसम मुख्यतः सफा वा आंशिक बदली रहने जनाइएको छ।

कोशी, मधेस, बागमती लगायत पहाडी क्षेत्रका थोरै स्थानमा र अन्य भागका एक–दुई स्थानमा मेघगर्जन, चट्याङसहित हल्कादेखि मध्यम वर्षाको सम्भावना रहेको छ। उच्च पहाडी तथा हिमाली क्षेत्रमा भने हल्का वर्षा र हिमपातको सम्भावनासमेत रहेको महाशाखाले जनाएको छ।

मौसमको यस्तो स्थितिले दैनिक जनजीवन, कृषि, स्वास्थ्य, सडक तथा हवाई यातायातमा असर पार्न सक्ने भएकाले आवश्यक सतर्कता र तयारी गर्न महाशाखाले नागरिकहरूलाई आग्रह गरेको छ।
#मनसुन