विराटनगर– विराटनगर महानगरपालिकाका प्रमुख प्रशासकीय अधिकृत राजेन्द्र पराजुली उमेर हदका कारण अनिवार्य अवकाश प्राप्त गरेका छन् । 

आइतबार महानगरमा विशेष कार्यक्रम आयोजना गरी पराजुलीको विदाई गरिएको छ । कार्यक्रममा महानगर प्रमुख नागेश कोइरालाले अविर, टीका र खादा लगाएर मायाको चिनो प्रदान गरी पराजुलीको विदाई गरेका हुन् । कोइरालाले प्रमुख प्रशासकीय अधिकृतका रुपमा राजेन्द्र पराजुलीले जनप्रतिनिधि र कर्मचारीबीचको सम्बन्धलाई थप मजबुत बनाउन महत्वपूर्ण भूमिका निर्वाह गरेको बताएका छन् । 

अवकाश प्राप्त पराजुलीले जनप्रतिनिधि र कर्मचारीबीचको सम्बन्ध नङ र मासुको जस्तै हुनुपर्नेमा जोड दिए । ‘जनप्रतिनिधिसँग जनताका असीमित चाहना हुने भएकाले कर्मचारीले जनप्रतिनिधिका समस्या बुझेर काम गर्नु आवश्यक छ,’ उनले भने, ‘जनप्रतिनिधि र कर्मचारीको सम्बन्ध सुमधुर नभए विकासले गति लिन सक्दैन ।’ मोरङको साविक हसन्दह स्थायी घर भएका पराजुली लेखापालबाट सरकारी सेवा प्रवेश गरी सहसचिवबाट अवकाश भएका हुन् । 

महानगरको निमित प्रमुख प्रशासकीय अधिकृतको जिम्मेवारी शैक्षिक प्रशासन महाशाखा प्रमुख रामप्रसाद ढुंगेललाई दिइएको छ ।